و رغم الثلج و البرد
لسه هنا دافى
و رغم وجعى فى قلبى
عمرى ما هخلص هتافى
***
بحبك يا مصر بحبك
و أجرى و انا حافى
و تتجرح رجلى
و تتفقع عينى
و اصرخ انا باسمك
بناديكى يا بلادى
و تزعق فيا ناس
يا ابنى شوف حالك
اقولهم و حالها مين يشوفهولى ؟
و اجيب عيالى ازاى
فى خرابة و زبالة
انا راجل ذكى و همام
ضحيت بعينى فى مكان
هيشوفوا فيه النور
انا راجل حكيم
مش زى ناس بريالة
ضحكوا عليهم بطقم اطباق
و معاها غسالة
انا جيت ابنى و اعمر
و ان يبست ارضها
سمادها من دمى
انا مصرى
أجندتى فى جيبى
بكتب عنواين الأهل حتى ما انساها
و فى نصها قصايد شعر
و نصها حب فى بنت
عنوانها مش عندى
و انا برسم فى آخرها
صورتها فى خيالى
و رغم احلامى
و اجندتى الطاهرة
رميت ده كله
و نزلت فى مظاهرة
و هتقولوا مجنون
و العقل ده ضايع
و العقل فيه فكرة
و الفكرة مش بتموت
و الفكرة دى كنز
و الأخ مش مجنون
ده لو فكرته صلحت
هنكون ملوك الكون
و لو فكرته طفشت
هنشوف مين المجنون
21/4/2011
حقوق النشر محفوظة
